《老戲台》
咱平平會記迄 (hit) 間老戲台
門口兮 (ê) 塗豆芳
毋捌離開記持
磚壁一年一年黜 (lut) 漆
隔幾年隔幾年過漆
已經毋是識目兮黃金色
看來看去
聽無明白兮電火戲
咱平平袂 (bē) 記迄間老戲台
頂一代敢若不時有講起
啊～
有我父母牽手兮記持
有我最後行出來
兮一九九三年
咱平平會會記迄間老戲台
原在佇迄條
日暝無歇工兮路邊
咱平平袂袂記迄間老戲台
上驚是
賰名無賰戲
這是我寫予坡底一間老戲台兮歌詩。
我會記細漢時佮阿嬤 (má) 看戲兮情景，會記佇戲台門口來來去去兮車、來來去去兮人、來來去去兮各種無像 (siāng) 款兮味素。庇能 (Pī-néeng) 過去兮二十年內經驗誠大兮改變，懸樓愈起愈濟，人口愈徙愈密。這不時予我想起舊早佇丹絨武雅 (Tán-jióng-bú-ngá) 經驗過兮「改變」。
我較少年時佇丹絨武雅兮海南村長大。我猜應該有誠濟人根本毋知、毋捌聽過「海南村」。我外公早幾十年前是培華小學兮校長。學堂附近有一个甘榜 (kám-pung) 囝，包圍牢 (tiâu) 瓊誼社 (Khêng-gî-siā) 四旁 (pêng) 兮隔壁厝邊大部份是海南人。我有記持以來，逐日聽著兮僨 (pún) 是海南話。若欲記錄一个所在兮故事，就無法度放開佇這个所在企 (khiā) 家兮人。愛記錄這人兮故事，就放袂開伊故事內底用兮字眼、講兮話。今日，若閣再踏入這甘榜囝，海南話煞已經無影無蹤。
庇能愈變愈國際化，咱每一日歡迎世界各地兮遊客來臨，每一日拍開大門予人參觀古早時祖先生活過兮款樣，行踏過兮五骹基，連食過兮味素僨儘量一代一代傳落去。咱訓練後生兮一代用外國人慣勢兮話音，來介紹、來深入瞭解咱放佇心內寶惜兮鄉里。
對大部份兮少年家來講，用本地人熟似兮福建話來表達想法煞變做一項食力兮工課。爲著保護一條街，有人會翻山過嶺做伙去，點燈牽手坐規暝。改變一條街兮命理，是普通百姓才調以外兮代誌。但是無管有偌艱苦，成萬人會行出來，爲著一个所在兮歷史出聲、出力。面對咱一日比一日落勢兮本地話，所欠缺兮就是這種拼勢。
若袂記一个所在佇本地話內兮叫法，會自然連這所在兮歷史僨予拭掉去。我會記日落洞倚海有幾家口，過去兮幾若代做船，是庇能其中一項誠重要兮行業。但是興盛兮年代過去，今日聽有「船廊 (tsûn-lóng)」這講法兮少年人已經無濟。開頭兮歌詩，寫兮是一間出名兮戲台。無入過去兮少年一輩，無看過一齣戲，僨有聽過戲台兮大名。伊毋凈止 (tsēng-tsí) 是坡底無人毋知兮地標，閣是歷史兮大流內面，沖袂去兮跡印。但是戲台僨可能面對著拆掉兮一日，伊毋是咱厝內兮產業，無論是汝佮我，僨無法度將伊一代一代傳落去。本地話兮命運煞扲佇汝佮我兮手內，佇咱一步一步將庇能推銷出去兮像時，是毋是應該停落來想看，除了風景、美食以外，咱兮故事，敢會使用咱熟似兮話音記落來？
